نازانم مانای چیە، نازانم بۆچیە؟ نازانم سودی چیە؟ بەڵام ئەزانم تامی چیە... سەیرە وانیە؟ گەر 8 ساڵ لەمەوبەر ئەم قسانەم بکردایەی ئەموت تێک چوم و پێویستم بەوەیە خێرا دەستنوێژێک بگرم و چوار ڕکات نوێژی بیرکردنەوە بکەم...

بەڵام نەء ... نەخێر زۆر چاک ئەزانم ئەڵیم چی، وەکو هەموو گیانلەبەر و بێ گیانەکانی دایکە زەوی، پێش خۆت چی پێدابیت تۆش هێندە توانات هەیەو گەر چنار کەم کەم لە چڵێکەوە باڵای نەکردایە ئەوا ملی زەڕافە یان لەو نزمتر ئەیگەیشتێ و گەڵای پێوە نە ئەهێشت بۆیە لەسایەی تەمەنی درێژی ساقەکەی گەڵاکانی بە ئاسودەیی ئەژین..! گژو گیای داماویش چونکە نوساون بە زەویەوە مل پان مل پان ئەوەی دەمی بگاتە زەوی لە بن هەڵیان ئەکێشێ و ئەبن بە دو قاپ شیرو پاشتریش ئەبنەوە بە پاشەڕۆ و زۆر لەگەڵ گەڵا بەرزەکانی چنار جیاوازیان نیە، بەڵام خۆ دوای مەرگ هەست ناکەی ئەگەر هەموو دنیاش تف و لەعنەتت لێ کات یان ببیتەوە بە شیاکە... مەگەر وانیە مێشکە شێت و هارەکەم؟

خۆ ئەگەر ئەڵێی نەخێر گیا لەسەر بنجی خۆی ناڕوێتەوە، ئەڵێم ئای کە خۆشە هەورە تریشقە لە بێ دەنگی شەوێکی تاریکدا، سروشتی ئەو جێگایە تێک ئەدات و ڕواڵەتی بۆ هەمیشە ئەگۆڕێت، بەڵام خۆ نە من ئەو شەوەم و  تواناکانی دەرو بەریشم هەورەگرمەش نین تا بتوانن سروشتی ژیانم بگۆڕن و بەڵکو هیچ نەبێ کوڕەکانم لەسەر بنجی خۆیان نەڕوێنەوە و چیتر ئاخ بۆ شتێک هەڵ نەکێشن کە تەنها ئێمە نەمان بێت...بۆ؟ بۆچی تەنها ئێمە؟ ئاخر بۆ؟ قەینا خەتای خۆمانە، بەڵام بۆ؟ دیسان بۆ؟ ئاخر نابێ، هەر ئەبێ بڵێم بۆ؟بۆ؟.....بۆ......بۆ...بۆ...............

گەر باپیری شێر نەڕەی عەرشی دارستانی نەهێنابایە لەرزە هەرگیز لە بێچوە شێر نە ئەترسان و دارستانیش بێ سەرۆک و بێ پێشەوا ئەمایەوە. هیچ گومانی تیا نیە ئەم ژیانەی منیش پەیوەندی ڕاستەوخۆو یەکسەری هەیە بەو قەدو باڵایەی نەتەوەکەم و دایک و باوکم هەیەتی و منی لەسەر ڕواوم... مەگەر وانیە مێشکە خێر لە خۆ نەدیوەکەم؟

مەگەر من پێم خۆش بوو لە 9 ساڵی کیمیا باران و لە 10 ساڵی نوگرە سەلمان و لە 12 ئاوارەی ئێران (دوبارە) و لە 19 ساڵیش تەزبیحی هەندەران هەڵگرم و دانە دانە وڵاتەکانی بهۆنمەوە تا بتوانم لە ملی کەم و بەڵکو لە دیوەخانی گەرمی باڕێکی وڵاتی نیفاق و دو ڕویی بە ڕو زەردی و سەرکزی ڕوم نەیەت بڵێم: بەرد لە جێی خۆی سەنگینە، ببورن ڕۆحی ئەوانەی توانیان مرۆڤایەتی شەرمەزارکەن لەکاتێکیشدا وەک ئێمە پەنابەر بوون، بەڵام بەخوا هەر ئەیڵێم چونکە من و ئەوان (زۆرن ناوهێنان بێ ڕێزیە بۆ ئەوانەی ناویان ناهێنم) جیاوازیمان ئاسمان و ڕێسمانە...چونکە من گژ و گیاو ئەوان گەڵای پۆپی سپیە چنارێک، تەنها ڕەنگەکانمان لە یەکە!

بێزارم زۆر، بەڕاستی بێزارم، لە هەموو شتێک... کەس لێم تێ ناگا...کەس تاقەتی نیە گوێ بگرێ تا تێ بگا، چونکە ئەویش وەک من وایە..منیش تاقەتم نیە گوێ لەکەس بگرم و لێی تێ بگەم....پارادۆکسێکە بێ ئەنجام...هۆیەکەشی دیسانەوە سەرەتای ئەم بابەتەیەو ئەمیش پارادۆکسێکی ترەو مێژو ئێستاو داهاتوو ڕا ئەکێشێ بەدوای خۆیاو ئێستاو داهاتوش بە بێ مێژوو مانای دروستی ژیان نیەو، گەر مێژوی لێ دەرکەی ژیان ئەگەر هەش بێت، لای من پێناسەکەی نەپێکاوەو ناتوانم بانگ بدەم بە گوێیدا...